Nephi.Ink

Ang pagsibol ng Makata

​

Hindi niya alam kung kelan ang unang beses 
umalpas ang mga salita sa kaniyang dila 
at nagkaroon ng sariling himig.

​

Maski ang huling beses na lumingon 
sa durungawan at lumikha ng pelikula 
sa kan'yang isipan, hindi rin niya tiyak.

​

Maaaring kailanma'y hindi siya magiging sigurado
sa petsa't panahon;
kung kelan ang una at huli;
simula at wakas;
pagsibol at paglanta.

​

Paulit-ulit man s'yang gambalain ng mga salita't retrato;
hindi man siya patulugin ng haluyhoy ng mga yumaong salita;
at mapagod man sa kakahabol ng senaryo sa kawalan,
mananatali ang kaniyang adhikain:
ang maging ganap na makata.

​

Kung kailan? Hindi pa niya tiyak.